မင်္ဂလာကိစ္စအမြန်ချောမောအောင်မြင်စေသောယတြာ

တစ်နေ့မှာ ကျွန်တော်ဆီကို အသက်အရွယ်အားဖြင့် (၂၈)နှစ်ခန့်ရှိသော အမျိုးသမီး တစ်ဦး ရောက်ရှိ လာပါတယ်။ သူက ကရင် အမျိုးသမီး တစ်ဦးပါ။ သူက ကျွန်တော်ဆီမှာ ဗေဒင်လာမေးတဲ့ အဓိက ရည်ရွယ်ချက်က သူ ဒီသတင်းကျွတ်မှာ သူ့ချစ်သူနဲ့ အိမ်ထောင်ပြုဖို့ ရည်ရွယ်နေတာ အောင်မြင်မလား မအောင်မြင်ဘူးလား ဆိုတာကို အဓိက သိချင်ပါတယ်လို့ ပြောပါတယ်။ အဲဒီတော့ ကျွန်တော်က သူ့ကို တားရော့ ချိုးခိုင်းလိုက်တယ်။ မှတ်မှတ်ရရ တားရော့ကဒ်က ဧကရာဇ်ကဒ် ကျပါတယ်။

အဲဒီတော့ ကျွန်တော်ကလည်း စိတ်တော့ မကောင်းပါဘူး မိန်းကလေး။ မင်းတို့ ရည်ရွယ်နေတဲ့ မင်္ဂလာကိစ္စ မအောင်မြင်နိုင်ပါဘူး။ ဆွေမျိုးသားချင်း အကြီးအကဲတွေကြောင့် အဆင်မပြေ ဖြစ်မယ်လို့ ပြောလိုက်တော့.. သူက ဟုတ်ပါတယ် ဆရာရယ်။ သူက မွန်အမျိုးသား တစ်ယောက်ပါ။ သူနဲ့ ကျွန်မနဲ့ အိမ်ထောင်ပြုဖို့ ကိစ္စကို သူ့အမေက လုံးဝ သဘောမတူပါဘူး။ အဓိက ကတော့ သူ့အမေပါ။ မွန်နဲ့ ကရင်ယူလို့ မရဘူးလို့ချဉ်း ပြောနေတယ်။ နတ်မတည့်လို့တဲ့ ဆရာရယ်။

အဲဒါ ဆရာ ကူညီလို့ရရင် ကူညီပေးစေချင်ပါတယ်။ ကျွန်မတို့ နှစ်ယောက်က ချစ်သူ ဖြစ်တာလည်း သုံးနှစ်ကျော် နေပြီ။ တစ်နှစ်လာလည်း အဲဒီကိစ္စကြောင့် ပျက်ရ။ နောက်တစ်နှစ်လာလည်း ဒါကြောင့်ပဲ ပျက်ရ ဆိုတော့ ကျွန်မလည်း တော်တော်လေး စိတ်ဓာတ်ကျလာပါပြီ ဆရာရယ်။ တစ်ခါတလေတော့လည်း သူ့ကို ပြစ်လိုက်ဖို့ အထိတောင် စဉ်းစားပါတယ်။ ကျွန်မစိတ်ကို ကျွန်မ မထိမ်းနိုင်လို့ရယ် နောက်ပြီး သူကလည်း ရိုးသားတဲ့ လူငယ် တစ်ယောက်ဖြစ်လို့ပါ။ ဒါကြောင့် ကျွန်မတို့ နှစ်ယောက်ရဲ့ အိမ်ထောင်ပြုဖို့ ကိစ္စကို အမြန်ဆုံး အောင်မြင်အောင် ဆောင်ရွက် ပေးစေချင်တယ်လို့ ကျွန်တော်ဆီမှာ အကူအညီ တောာင်းပါတယ်။

အဲဒီတော့ ကျွန်တော်ကလည်း အော် အခုခေတ်မှာ ဒါမျိုးတွေလည်း ရှိသေးတယ်နော်လို့ ဆိုလိုက်တော့ သူက...

ရှိတာပေါ့ ဆရာရယ်။ များသောအားဖြင့် သူ့အမေလို ရှေ့ရိုးစွဲ အယူအဆတွေကို ဆုတ်ကိုင်ထားတဲ့ လူတွေ ရှိနေ သရွေ့တော့ ကျွန်မတို့ လူငယ်တွေရဲ့ နှလုံးသားရေးရာ ပြဿနာတွေ ပေါ်နေဦးမှာပါပဲ ဆရာရယ်။ အမှန်တကယ် ကို လူမျိုးခြား ဘာသာခြားတွေ ဆိုရင်တော့ မပြောပါဘူး ဆရာရယ်။ အခုတော့ သူနဲ့ ကျွန်မနဲ့က မြန်မာလူမျိုး အချင်းချင်း နောက်ပြီး ဗုဒ္ဓဘာသာ အချင်းချင်းတွေပါ။ ဘာကြောင့် ကျွန်မတို့ ကိစ္စကို ဒီလောက် အသဲအသန် ဖျက်နေရသလဲ ဆိုတာ မစဉ်းစား တတ်အောင်ပါပဲ ဆရာရယ်။ ဒါကြောင့် ကျွန်မ ဆရာဆီမှာ အကူအညီ လာတောင်းတာပါ။

ကျွန်ုပ်သည် ထိုမိန်းကလေးအား မင်္ဂလာကိစ္စကို ချောမောစွာ အောင်မြင်စေသော အောက်ဖော်ပြပါ ယတြာကို လေးလေးနက်နက် လုပ်ခိုင်းခဲ့၏။ ထိုမိန်းကလေးကလည်း ကျွန်ုပ် ညွန်ပြသည့်အတိုင်း လိုက်လုပ်ခဲ့လေ၏။ သုံးလခန့်အကြာတွင် မွန်အမျိုးသား ကောင်လေးနှင့် ကရင်အမျိုးသမီး ကောင်မလေးတို့၏ မင်္ဂလာဧည့်ခံပွဲ ဖိတ်စာတစ်ဆောင်သည် ကျွန်ုပ်ထံသို့ ဆိုက်ဆိုက်မြိုက်မြိုက် ရောက်ရှိလာခဲ့တာ အမှန်တကယ် ဖြစ်ပါသည်ဟု ကျွန်ုပ် ကျိန်တွယ်၍ ပြောပြလိုက်ရပါ၏။

မင်္ဂလာကိစ္စ ဆောင်ရွက်ဖို့အတွက် အကြောင်းအမျိုးမျိုးကြောင့် ထစ်ငေါ့ ကြန့်ကြာနေသူများ၊ သို့မဟုတ် မင်္ဂလာ ကိစ္စ ပျက်စီးသွားမည်ကို စိုးရိမ် ထိတ်လန့် နေသူများ မည်သူမဆို အောက်ဖော်ပြပါ ယတြာကို လေးနက် ယုံကြည်စွာ ဆောင်ရွက်လိုက်ပါ။ ရက်ပိုင်းလပိုင်းအတွင်း အနှောက်အယှက် အခက်အခဲများကို ကျော်လွှား၍ အောင်မြင်နိုင်မည် ဖြစ်ပါကြောင်းကို စေတနာကောင်းဖြင့် သီတင်းကျွတ်လက်ဆောင် အဖြစ် ရေးသားဖော်ပြ ပေးလိုက်ရပါသတည်း

မင်္ဂလာကိစ္စချောမောအောင်မြင်စေသောယတြာ

တနင်္လာနေ့နံက် (၉း၀၀)တိတိ ရောက်တိုင်း မိမိနေအိမ်တွင်ပင် ၀သုနြေ္ဒနတ်မင်းကို ရည်စူး၍ ဖယောင်းတိုင် (၉)တိုင် တိတိ လှူဒါန်း၍ မိမိတို့၏ မင်္ဂလာကိစ္စ အောင်မြင်ပါစေကြောင်း ဆုတောင်းပါ။ တစ်ယောက်လုပ်ရင် ရပါ၏။ နှစ်ယောက်စလုံး စိတ်တူ ကိုယ်တူ လုပ်ဆောင်ပါက ပို၍ လျှင်မြန်စွာ အောင်မြင်နိုင်ပါကြောင်း စေတနာကောင်းဖြင့် ၀ါကျွတ်လက်ဆောင် အဖြစ် ရေးသားဖော်ပြ ပေးလိုက်ရပါသတည်း။

သင်တို့၏အကျိုးကိုထာဝစဉ်လိုလားသော
ဟိန်းတင့်ဇော်