နေ့စဉ်ကုန်ကျစရိတ်များပြန်ဝင်လာစေသောဂါထာတော်

လွန်ခဲ့သော လအနည်းငယ်ခန့်က ထိုင်းနိုင်ငံ-မဟာချိုင်မြို့- နေ၀စ်ရှိ ကျွန်ုပ်၏ ဗေဒင်လက္ခဏာ ဟောခန်းအတွင်းသို့ ခိုနှင့် အလားသဏ္ဍန်တူသော အသက်(၃၈)ခန့်ရှိ ကိုသိန်းတန်ဟု အမည်ရသော လူတစ်ဦး ရောက်ရှိလာလေ၏။ ကိုသိန်းတန်တန်သည် လွန်စွာ အငြီးတွားသန်၍ လွန်စွာမှလည်း စိတ်ပျက်အားငယ် တတ်သောသူ တစ်ယောက်လည်း ဖြစ်လေ၏။ ၎င်းသည် ကျွန်ုပ်၏ ဗေဒင်ဟောခန်း အတွင်းသို့ ၀င်ရောက်လာပြီးလျှင် မြတ်စွာဘုရားရှင် ကိုယ်တော်မြတ်ကြီးအား ကောင်းကောင်းပင် မရှိခိုးနိုင်သေးပဲ ကျွန်ုပ် ဗေဒင်ဟောသော ခုံရှေ့တွင် ၀င်ရောက်၍ ခြေပစ်လက်ပစ် ထိုင်ပြီးလျှင် လောကကြီးကို အပြစ်မြင်ပြီး ခိုသတ္တ၀ါကဲ့သို့ စတင်၍ ငြီးတွားလေတော့၏။

ပြော မပြောချင်ဘူး ဗေဒင်ဆရာရေ....။ ကုန်ဈေးနှုံး ကုန်ဈေးနှုံးဆိုတာကလည်း ကျတယ်ဆိုတာကို မရှိတော့ဘူး။ အတက်ပဲ ရှိတယ်။ အကျမရှိဘူးဆိုတာ ကုန်ဈေးနှုန်းကို ခေါ်တာ ထင်ပါရဲ့။ ဒီအတိုင်းဆိုရင်တော့ တယ်မလွယ်ဘူး။ ရှေ့လျှောက် ဘယ်လိုဆက်ပြီး စခန်းသွားရမယ်မှန်းတောင် မသိတော့ပါဘူး ဗေဒင်ဆရာ ရယ်။ ထိုင်းနိုင်ငံမှာ လုပ်စားကိုင်စားရတာ မလွယ်တော့ပါဘူးဆိုမှ ဒီကုန်ဈေးနှုန်းကလည်း တက်ပြီးရင် မကျတော့ဘူး ဆိုတော့ ဘယ်လိုလုပ်ပါ့မလဲ။ မဟုတ်ဘူးလား ဗေဒင်ဆရာရယ်ဟု ကျွန်ုပ်အား စတင်၍ ပြောလေ၏။ ထိုအခါ ကျွန်ုပ်က သူ့အား ခေါင်းတစ်ချက် ညိတ်ပြလိုက်လေ၏။ ထို့နောက် ၎င်းက ဆက်လက်၍

အော်.... နောက်တစ်ခုကလည်း ရှိသေးတယ်ဗျ။ အခု ထိုင်းနိုင်ငံမှာ တရာဝင်မှတ်ပုံတင် မရှိသေးတဲ့ လူတွေကို အလုပ်သမား မှတ်ပုံတင် အသစ်ရိုက်ပေးတယ်လေ။ အဲဒါ ဟိုတလောကမှ ကျွန်တော့ သားလေး တစ်ယောက်နဲ့ သမီးလေးတစ်ယောက်ကို ကျောင်းထုပ်ပြီး ထိုင်းနိုင်ငံကို ခေါ်တင်လိုက်တယ်လေ။ အဲဒါ သူတို့တွေကိုလည်း ဘတ် ( အလုပ်သမားမှတ်ပုံတင်) ရိုက်ပေးရဦးမယ်။ နှစ်ယောက်ပေါင်းလိုက်ရင် အနည်းဆုံး ဘတ်ငွေ (၇)ထောင် (၈)ထောင်တော့ အသားလေးသွားမှာပဲ ဗေဒင်ဆရာ။ အဲဒါလက်ထဲမှာလည်း ငွေက အဆင်သင့် မရှိသေးဘူးဆိုတော့ အင်း သူများဆီ ယူရဦးမယ်။ အတိုးနဲ့ပေါ့ ဗေဒင်ဆရာရယ်။ ဘယ်တတ်နိုင်ပါ့မလဲ မဟုတ်ဘူးလား။ အကြွေးကလည်း ဘယ်တော့ ကင်းပါ့မလဲ ဗေဒင်ဆရာရယ်။ စိတ်ညစ်လိုက်တာဟု ထပ်ပြောပြန်လေ၏။ ကျွန်ုပ်လည်း ခေါင်းတစ်ချက် ထပ်မံ၍ ညိတ်ပြလိုက်ပြန်လေ၏။

အော် ... နောက်တစ်ခု ထပ်ပြောရဦးမယ် ဗေဒင်ဆရာ။ အခုတလော ထိုင်းရဲတွေလည်း အဖမ်းအစီးတွေက တယ်များသကိုး။ ကျွန်တော်တို့ တန်းလျှားဆိုရင် တစ်နေ့ကို အနည်းဆုံး မနက်တစ်ခေါက် နေ့လည်တစ်ခေါက် ညနေဘက်ကို တစ်ခေါက် အနည်းဆုံး ၀င်ဝင်ဖမ်းတယ်ဆရာ။ ကျွန်တော့်ကလေးတွေလည်း ဘတ်က မရိုက်ရသေးဘူးဆိုတော့ ရင်ထဲမှာ ပုလိပ်လာပြီဆိုတဲ့အသံကို ကြားလိုက်တာနဲ့ တံခါးကို အပြင်ကနေ ပြေးပြေးပြီး သော့ခတ်လိုက်ရတယ်။ အဲဒီအတွက် နှလုံးရောဂါတောင် ရချင်ချင်ဖြစ်နေပြီ ဗေဒင်ဆရာ။ ငယ်ငယ်တုန်းက မခုန်ဘူးခဲ့တဲ့ နှလုံးက အခု ပုလိပ်မြင်တာနဲ့ ရင်တုန်တတ်နေပြီ။ လောကကြီးမှာ ပုလိပ်ဆိုတဲ့ လူတွေမရှိရင် သိပ်ကောင်းမယ်နော်ဗျာဟု ပြောပြန်လေ၏။ ကျွန်ုပ်လည်း ကိုသိန်းတန်အား ခေါင်းတစ်ချက် အသာ ညိတ်ပြလိုက်လေ၏။

အော် ... ပြောရဦးမယ် ဗေဒင်ဆရာရဲ့။ အခုတလော လူဆိုးလူမိုက်တွေကလည်း အတော်ပေါလာသကိုး။ ဟိုတလောက ကျွန်တော်တို့ အခန်းဘေးက ကောင်လေးတစ်ယောက် လမ်းသွားရင်း ဖုန်းပြောလာတာ နောက်ကနေ ဆိုင်ကယ်နဲ့ ကပ်မောင်းသွားရင်း လက်ထဲကဖုန်းကို လုသွားတယ်လေ။ ဘာကြာသေးလို့လဲ ကျွန်တော့် အခန်းမျက်စောင်းထိုးက ကောင်မလေးတစ်ယောက်လည်း မင်္ဂလာဆောင်က အပြန် လမ်းရှောက်လာတာ ဘေးကနေ ဆိုင်ကယ်နဲ့ အသာလေးကပ်ပြီး ဆွဲကြိုးကို ဖြတ်သွားတယ်လေ။ ပါသွားတာ ပေါ့။ အဲဒီကောင်မလေးကလည်း မရှိလို့ သူများနိုင်ငံ လာလုပ်စားပါတယ်ဆိုမှ ဘာလို့ ရွှေဝတ်တာလဲ မသိဘူး။ ၀တ်ချင်ရင် ကိုယ့်နိုင်ငံ ပြန်ရောက်မှ တ၀ကြီးဝတ်ပေါ့။ အခုတော့ ဟင်း မပြောလိုက်ချင်ဘူး။ ခံရတာတောင် နည်းသေးတယ်။ အဲဒီ လူဆိုးလူမိုက်တွေ လောကကြီးမှာ မရှိရင် သိပ်ကောင်းမှာပဲ။ မဟုတ်ဘူးလား ဗေဒင်ဆရာဟု ကျွန်ုပ်အား ပြောပြန်လေ၏။ ကျွန်ုပ်သည်လည်း ထိုသူအား ခေါင်းတစ်ချက် ထပ်မံ၍ ညိတ်ပြလိုက်ပြန်လေ၏။

ထို့နောက် ၎င်းကိုသိန်းတန်သည် လာရင်းနှင့် မိုးမိသည်ဆို၍ မိုးရာသီမိုးဥတု မရှိလျှင် သိပ်ကောင်းမည် ဟု၎င်း။ ဗိုက်စာတိုင်း အလုပ်လုပ်နေရသောကြောင့် သမုဒ္ဒရာဝမ်းတထွာဆိုသော စကားကြောင့် နေ့စဉ် ၀မ်းတထွာအတွက် အလုပ်လုပ်ကိုင်နေရသောကြောင့် ဘ၀တစ်လျှောက်လုံး တစ်ခါဘူးမှ မနား၇သေးကြောင်း ထို့ကြောင့် ဖြစ်နိုင်လျှင် ထိုဝမ်းတထွာတောင် မွေးလာကတည်းက မပါလာရင် အတော်ကောင်းမည် ဖြစ်ကြောင်း၊ အစရှိသည်ဖြင့် မဖြစ်နိင်သည်များကို တစ်ခုပြီးတစ်ခုပြောဆို၍ ငြီးတွားလေတော့၏။ ကျွန်ုပ်သည်လည်း ထိုသူ တစ်ခါပြောတိုင်း ခေါင်းတစ်ခါ ညိတ်ပြရလေ၏။ ကြာလာသော အခါတွင် ၎င်းကိုသိန်းတန်သည် စိတ်တိုလာပုံ ပေါက်လာ၍ ဘယ်လိုလဲဗေဒင်ဆရာ၊ ဗေဒင်ဆ၇ာက ပုတ်သင်ညိုလိုပဲ ခေါင်းညိတ်ဖို့ပဲ တတ်သလားဟု ကျွန်ုပ်အား ပြောလေတော့၏။

ထိုအခါ ကျွန်ုပ်က ဒီမှာကိုသိန်းတန်ရဲ့။ ဒါက လောကသဘာဝတွေပါ။ ခင်ဗျားလည်းမသိဘူး ကျုပ်လည်း နားမလည်ဘူး။ ကောင်းတာတွေရော ဆိုးတာတွေရော တန်ဖိုးရှိတာတွေရော၊ တန်ဖိုးမဲ့တာတွေရော၊ သစ်ပင်တွေရော ၊ တောတောင်တွေရော ၊ ရေမြေတွေရော လောကကြီးမှာ ရှိသမျှ အရာဝတ္ထုတိုင်းဟာ လိုအပ်လို့ ရှိနေတာဖြစ်တယ်။ မလိုအပ်တော့တဲ့ တစ်နေ့ကျရင် ကမ္ဘာလောကကြီးကနေ အလိုလို ပြန်လည် ပျောက်ကွယ်သွားကြမှာ ဖြစ်တယ်။ ဒါကြောင့် ခင်ဗျားပြောတဲ့ အရာတွေအားလုံးဟာ လိုအပ်လို့ ရှိနေတာပေါ့ ဗျာ။ အဲဒါတွေကို ရှိရင်ကောင်းမယ်။ မရှိရင် ကောင်းမယ်လို့ ပြောနေလဲ ခင်ဗျားအတွက် ပါးစပ်ညောင်းတာပဲ အဖတ်တင်တော့မပေါ့ဟု ကျွန်ုပ်က ပြန်ပြောလိုက်လေလျှင် ကိုသိန်းတန်က ဒါဆို ကုန်ဈေးနှုန်းဈေးကြီးတာ လည်း ဗေဒင်ဆရာပြောတဲ့ လောကကြီးက လိုအပ်လို့ ဖြစ်နေတာလားဟု ကျွန်ုပ်အား ရွဲ့၍ ပြန်ပြောလေ၏။

ကဲပါ ကိုသိန်းတန်ရယ်။ ခင်ဗျား ကျွန်တော့်ဆီလာတာ ဗေဒင်မေးဖို့လာတာ မဟုတ်လား။ ဒါဆိုလည်း ဗေဒင်တွက်ကြရအောင်ဟု ပြောကာ ၎င်းကိုသိန်းတန်၏ ကံဇာတာ ကောင်းမကောင်း အဆင်ပြေမပြေ စသည်တို့ကို ပြည့်စုံစွာ ဟောပေးလိုက်ပြီလျှင် ဒီမှာ ကိုသိန်းတန် ကဲ... ဘာမေးချင်သေးလဲ။ နောက် ကျုပ် ဘာကူညီပေးရဦမလဲဟု ပြန်မေးလိုက်လျှင် ၎င်း ကိုသိန်းတန်က...

ဒီလိုပါဆရာ။ အရေးကြီးတာက ထမင်းလေး ဗိုက်ဝအောင် စားချင်တယ်။ အဲလောက်ပါပဲ။ ကျွန်တော်တို့လို လူတန်းစားတွေကို ဆရာ့ ယတြာပညာနဲ့ သန်းကြွယ်သူဌေးကြီး ဖြစ်အောင် လုပ်ပေးမယ်လို့ ပြောရင်လည်း ကျွန်တော် လက်မခံပါဘူး။ အဲလောက်ကြီးလည်း မတောင်းဆိုပါဘူး။ အရေးကြီးတာက မပူမပင်မကြောင့် မကျနဲ့ ထမင်း နပ်မှန်အောင် စားလို့ရမယ့် အဆောင်လေး ယတြာလေး ရှိရင် ပေးစေချင်ပါတယ်ဟု ကျွန်ုပ်အား ကိုသိန်းတန်က ပြန်ပြောလေ၏။

ထိုအခါ ကျွန်ုပ်က ကိုသိန်းတန်ရေ...ကျွန်တော် ခင်ဗျားကို ဂါထာတစ်ပုဒ်ပေးလိုက်ပါ့မယ်။ အဲဒီဂါထာကို မနက်ပိုင်း အခေါက်နှစ်ဆယ်၊ ညဘက် အခေါက်နှစ်ဆယ် ပုံမှန်ရွတ်ပေးမယ်ဆိုရင် နေ့စဉ်ကုန်ကျနေသော ကုန်ကျစရိတ်များ ပုံမှန် ပြန်ဝင်လာပါလိမ့်မယ်။ သမုဒ္ဒရာဝမ်းတစ်ထွာအတွက် ပူပင်သောက ကင်းဝေးသွားပါလိမ့်မယ်ဟု ပြောဆိုကာ အောက်ဖော်ပြပါ ဂါထာတော်အား ကိုသိန်းတန်ဆိုသူအား သင်ပေးလိုက်လေ၏။

ဗုဒ္ဓဂုဏော အနန္တော
ဓမ္မဂုဏော အနန္တော
သံဃာ့ဂုဏော အနန္တော
ဗုဒ္ဓေါ မေ သရဏံ အညံနတ္ထိ
ဓမ္မောမေ သရဏံ အညံနတ္ထိ
သံဃောမေ သရဏံ အညံနတ္ထိ
ဗုဒ္ဓံ သရဏံ ဂစ္ဆာမိ။
ဓမ္မံ သရဏံ ဂစ္ဆာမိ။
သံဃံ သရဏံ ဂစ္ဆာမိ။
ဧသာ ဉာတ္တိ ဂစ္ဆာ အမုမှိ သြကာသေ တိဋ္ဌာဟိ။

ကိုသိန်းတန်ဆိုသောသူသည် ကျွန်ုပ်ပြပေးလိုက်သော ထိုဂါထာကို ကူးရေးပြီးနောက် ကျွန်ုပ်၏ ဗေဒင်ဟောခန်း အတွင်းမှ ပြန်သွားလေတော့၏။

မှတ်မှတ်ရရ ၎င်း ကိုသိန်းတန်သည် ဒီနေ့ ကျွန်ုပ်၏ ဗေဒင်ဟောခန်း အတွင်းသို့ ပြန်ရောက်လာခဲ့လေ၏။ ၎င်းလက်ထဲတွင် ဆွဲလာသော အအေးဗူးများ ၊ စီကရက်များ ၊ မုန့်များကို မြင်လိုက်သည်နှင့် ကိုသိန်းတန်တစ် ယောက် ပူပင်ကြောင့်ကြ ကင်းစွာဖြင့် ထမင်းစားနေရပြီ ဖြစ်ကြောင်း ကျွန်ုပ်သိလိုက်လေတော့သတည်း။